Army kabulig han kapulisan para malutas an panmusil

An 42nd Infantry Battalion han Philippine Army in gin mandohan nga mag-asister ha Philippine National Police para pag-imbestiga han bag-o la nga pag-atake ngadto han mga meyembro han local nga tagapahayag nga nahinabo dida han naglabay nga Byarnes han gab-i ha Southern Luzon.

Hi Maj. Harold Cabunoc, tagapagyakan han 9th Infantry Division, nagsiring nga an mando in tikang kan Maj. Gen. Ruperto Pabustan, 9ID Commander, ngan kasumpay hini an mga kasundalohan in naghatag hin dugo kahuman makarawat an request nga tikang han pamiya han biktima nga kinahanglan nira hin blood donors.

Hi Miguel Belen, 48, usa nga reporter han usa nga estasyon han radyo DWEB FM nga naigbos mamatay, kahuman han panmusil han waray pa makilal-i nga armado nga tawo dida han alas 8:30 han gab-i petsa 9 han Julyo ha Iriga City, probensya hiton Camarines Sur.

Dinhi naman ha aton dapit, sumala kan Lt. Col. Armand Rico, tapagyakan han 8th Infantry Division nga nakabase ha Camp Lukban, Maulong, Catbalogan Samar nga may-ada gihapon mga media practitioners nga wanted han mga grupo han New Peoples Army tungod han pagpapahayag han tinood nga mga natatabo labi na gud pagbatikos han mga illegal nga binuhatan han mga npa ngadto han mga molopyo han Sinirangan Bisayas.

Dugang pa ni Lt. Col. Rico, para gihapon maseguro an seguridad han mga nasabi nga mga media practitioners mas mauro-upay nga diri nala ini hira ngaranan ha pagkayana. Ngan iya gin aaghat an mga media practitioners nga magpadayon han ira trabaho ngan magin mabinantayon, himoon an tama, klaro, balase ngan madagmit nga pagpa-abot han mga balita, ha pagtatapos ni Lt. Col. Rico./Ed

Army ngan mga bandido nga NPA nagbakbakan ha DavSur

An tropa han 10th Infantry Division han Philippine Army ngan mga New People’s Army o (NPA) in bg-o la nga nagbakbakan ha Southern Mindanao didto ha Sitio Upper Bakoko, Kapatagan ha Digos City probinsya han Davao Del Sur dida han mga alas 3:45 han kulop.

An tropa han 39th Infantry Battalion in nagresponde han inpormasyon han mga residente nga nagresulta hin engkwentro hin maabot 15 nga mga NPA nga pinamumunu-an nga nag-nga-ngaran kan Roberto Castillote alias Enoy meyembro han Local Terrorist Front-51. Ha dyes minutos nga pinusilay- nagresulta hin pag karekopo hin usa nga M16 assault rifle.

Nagtotoo an mga otoridad nga duha an possible nasamaran ngan namatay tungod nahikit-an hini han tropa han gobyerno nga may ada gin guguyod ngan gin aalsa han mga NPA nga ira kaupod. Sumala han militar, gin komperma han mga residente nga nakakita nga duha an gin aalsa nga lawas han mga NPA han ira pagkalagiw.

Sumala kan Maj. Gen. Carlos Holganza, Commander han 10th Infantry Division Philippine Army, an engkwentro in nagpapakita nga nagtitikakusog an suporta han katawhan han amon kampanya kontra terorismo ngan pagpuypuy han mga NPA ha kabukiran.”

“Amon gin aaghat an mga nawawara ha dalan nga aton mga kabugtu-an nga maki-usa hin mahimyang nga pamaagi ngan magsurender na para hira in makatagamtam hin bag-o nga panginabuhi kaupod han ira pamilya pero diri namon papabay-an an ira mga abuso han mga tawo nga naruruyag hin kamurayawan nga amu an biktima han ira extortion ngan terroristic attacks.” Ha pagtatapos ni Holganza./ed