2 nga patay nga lawas han NPA, nabukad!

Natad-an hiton mga brgy. Officials han Concepcion, Arteche Eastern Samar, ha usa nga himabaw nga hukab an patay nga lawas hin duha nga miyembro han New People's Army o (NPA), duha ka adlaw kataliwan magkamay-ada hin engkwentro ha butnga han mga rebelde ug han 14th Infantry Battalion, ha kabukiran han brgy. Dorillo, Jipapad E. Samar.

Sumala han report hiton 8th Infantry Division - Division Public Affairs Office o (DPAO), banda alas 4:30 han kulop dida han Pebrero 14, 2010, durante han pagdumara hin temporary patrol base han army platoon nga ginpamunuan ni sgt. Orosco, nadiskubre ug nabukad an duha nga patay nga lawas nira Lilio Liad alyas Binal ngan an usa in nakilala la nga alyas Navy/Antoy. Pinaagi han mga brgy. Tanod ug brgy. Officials, nga ginpangunahan naman ni brgy. Chairwoman Zeradia Pajares.

An mao nga mga opisyales naman an kumilala han mao nga mga patay nga lawas ug gumios agud matagan hin disente nga lubong an mga ini.

Samtang ginpapamulat an Official Autopsy Report, nahimalatumat nga nag-angkon hin mga igo hin bala an kalawasan han duha nga cadavers - kun diin an usa in mayda igo ha may irok, samtang an usa liwat in may igo hin bala ha liog.

Gin kumperma han kasundaluhan nga an duha nga patay nga lawas, in miyembro han Regional Security Force, Bangkaw Platoon, Eastern Visayas Regional Party Committee han NPA nga grupo ngan mahihinumduman ginka-engkwentro han 14IB ha pamumuno ni Sgt. Jessesito Pejana, ug nag-resulta han paka-rekupo han mga army hin M16 ug M14 rifles, dida han Pebrero 12, 2010.

Kasumpay hini, nagpadara hin tropa hi Lt. Col. Jaime Hidalgo, Commander han 14IB agud mag-hatag hin assistance ha pag-eksamin, ug pag-lubong han mao nga mga cadavers.

Samtang, ginpahayag naman ni 8th infantry division commander nga hi Maj. Gen. Arthur Tabaquero an iya pagpasalamat han mga brgy. Officials nga naka-diskubre ug naghatag hin report ha mga otoridad bahin han panhitabo.