Rebelde nga NPA nagsurender hin armas; balik eksperyensya han tinood nga demokrasya

Kakuri-an, gutom, kaawa, kawaran pagla-om ngan kasubo an pipira la nga mga rason an nayakan han dati nga rebelde kahuman han bolontaryo niya nga pagsurender ha usa nga meyembro han Charlie Company han 19th Infantry Battalion, 12:30 p.m. petsa 26 han Pebrero

Sumala ha report, hi Lemy Oronuz, 23 anyos, nga tinatawag nga Joshua samtang nakadto hiya han underground movement han Pingkoy Platoon han Front Committee Leyte. Hiya in residente ha Brgy. Oguesan, Mac Arthur, Leyte nga nagin meyembro han organisasyon nga NPA hin pira ka tuig.

Segun pa ni Orunuz, diri na niya kaya an kakuri-an nga naiiksperyansyahan pati na an iya mga kaupod ha ilarom han kagi-usan labi na gud an ira gin hihinulat nga katumanan han mga panaad hadto in hira gin re-recruit pala.

Dugang pa Orunuz, nga an iya iba pa nga kaupod in nagpapakita nah in intensyon para sumunod han iya mga nagin desisyon na gumawas na ha kagi-usan ngan bumalik na han tinood nga demokrasya nga maiha na nga gin kuha han partido ngan kagi-usan.

Iya gin malatumat, nga hira in naaghat han mga testimonya han iya mga nagin kaupod nga nakatagamtam na han kanan gobyerno programa an Social Integration Program (SIP) ngan nakita nira an kamatu-oran. Ha ira pagtoo kun hin-o man an masurrender in papatayon han mga military pero ini in buwa la ngay-an.

Hi Orunuz in boluntaryo nga nagsurender ngato han sundalo ha 19IB nga dara an iya M16 rifle nga mayday tulo nga long ngan tulo nga short magazine nga loaded hin mga bala.

Hini nga panhitabo, an 8ID Commander, nga hi Maj. Gen. Arthur Tabaquero in gin tagan hin kasegurohan hi Orunuz bahin han iya seguredad ngan an iya ngaran in dayon ig i-enrolled han SIP program.

“Personal ko nga gin appreciate an tama nga gi-os ngan desisyon nga gin buhat ni Lemy. Hiya in bata ngan damu pa an iya mahihimo ha iya pangidaron ngan maitatama pa niya adton mga naglabay nga mali nga desisyon ngan magmamaupay pa an iya kabubuwason”, dugang pa Maj. Gen. Tabaquero.

“Gin o-utro ko an akon panawagan ngadto han aton kabugto-an nga ada pa ha underground movement nga akon gin ko-consider nga mga biktima, nga sumunod han maupay nga nagin desisyon ni Lemy ngan magin mabinungahon an ira kabubuwason. Kausa ako han magkalain-lain nga ahensya han gobyerno, People’s Organization, Local Government Units ngan Cause Oriented ug Progressive Groups nga mapaangbit han ira parte para han adbokasiya nga matapos na an insurhensiya nga nagpapadayon nga rason sanglit an peace and development han probinsya in diri hul-os nga natatagamtaman.” Ha pagtatapos ni Maj. Gen. Tabaquero.